NAILABAS na ng Quezon City Regional Trial Court Branch 98, sa ilalim ni Presiding Judge Maria Angelica P. De Ramos, ang warrant of arrest laban kay Vice President Sara Duterte sa tatlong counts ng grave threats. Itinakda ng korte ang piyansa sa ₱120,000 bawat count, kaya hindi ito kasong awtomatikong magpakukulong sa Bise Presidente habang dinidinig ang kaso.
Pero dito nagiging mas interesante ang usapin.
Ang alegasyong grave threat na pinag-uusapan sa criminal case ay bahagi rin ng Article IV ng impeachment case laban kay VP Sara. Kaya hindi maiiwasang magbanggaan ang dalawang proseso.
Sa criminal case, presumed innocent ang akusado hanggang mapatunayan ang guilt beyond reasonable doubt. Sa impeachment naman, iba ang proseso at pamantayan ng ebidensiya.
Kaya kung wala pang final judgment sa criminal case, maaari itong gamitin ng depensa upang kwestyunin ang paggamit sa parehong alegasyon bilang bahagi ng impeachment proceedings.
At heto ang mas mabigat na bahagi.
Kung naituloy ang criminal prosecution sa grave threat habang may impeachment trial, hindi malayong sumunod ang iba pang criminal charges tulad ng PLUNDER laban sa Bise Presidente.
At kung plunder ang susunod na isampa batay sa mga alegasyong ginagamit din sa impeachment, ibang antas na naman ang haharapin ng Pangalawang Pangulo. Ang plunder ay isang non-bailable offense kapag ang ebidensiya ng guilt ay strong sa ilalim ng Konstitusyon.
Kaya nagiging mas malawak ang legal battle.
Hindi natin sinasabing siguradong mangyayari ito. Wala ring sapat na batayan para sabihing ang grave threat case ay sadyang ginawa bilang preparasyon para sa plunder case.
Pero ang timing at sabayang pag-usad ng mga kaso ay natural na magpapalakas sa hinalang may mas malawak na legal offensive laban sa Bise Presidente.
At habang umiikot ang mga kaso kay VP Sara, may isa pang malaking iskandalo na hindi dapat malimutan: ANG FLOOD CONTROL SCANDAL.
Maraming pangalan ang nadawit. Maraming alegasyon ang lumutang. Ngunit habang mabilis ang galaw ng kaso laban sa Bise Presidente, marami pa ring inaabangan ang taumbayan na konkretong aksyon laban sa mga sinasabing sangkot sa bilyon-bilyong flood control funds.
Sa isang banda, warrant. Sa kabilang banda, naghihintay pa rin ang publiko.
Kung mabilis ang hustisya para sa isa, sana hindi mabagal para sa iba.
