MANILA, Philippines – Suspendido ang permits to carry firearms outside residences (PTCFORs) sa Lungsod ng Maynila mula Huwebes, Enero 8, hanggang Sabado, Enero 10, kaugnay ng pagdiriwang ng Feast of Jesus Nazareno 2026, ayon sa Philippine National Police (PNP).
Nauna nang sinabi ng lokal na pamahalaan ng Maynila na ipatutupad din ang pagbabawal sa pagbebenta at pag-inom ng alak, gayundin ang pagbebenta at paggamit ng firecrackers, bilang paghahanda sa taunang relihiyosong kapistahan.
“The PNP leadership approved the recommendation of the National Capital Region Police Office (NCRPO) to suspend the permit to carry firearms outside residence (PTCFOR) from January 8 to January 10,” pahayag ni Acting PNP chief Lt. Gen. Jose Melencio Nartatez Jr.
Nilinaw nina PNP public information chief Brig. Gen. Randulf Tuaño at NCRPO public information chief Maj. Hazel Asilo na ang suspensyon ng PTCFOR ay para lamang sa Lungsod ng Maynila.
“I am urging our kababayans to work with us. We will not succeed if we are the only ones acting to maintain order during the Feast of Jesus Nazareno,” dagdag ni Nartatez.
Nauna ring sinabi ng PNP na magde-deploy ito ng mahigit 18,000 law enforcers upang masiguro ang seguridad ng pagdiriwang. Noong nakaraang taon, umabot sa 8.12 milyong deboto ang dumalo sa kapistahan, ayon sa Quiapo Church. RNT/MND
