Home NATIONWIDE Guo, 30 iba pa kakasuhan ng DOJ ng money laundering

Guo, 30 iba pa kakasuhan ng DOJ ng money laundering

MANILA, Philippines- Kakasuhan ng Department of Justice ng patong-patong na kasong paglabag sa anti-money laundering law si dating Bamban mayor Alice Guo at 30 iba pa.

Inirekomenda ng DOJ panel of prosecutors ang pagsasampa ng 26 na bilang ng money laundering sa ilalim ng Section 4(b) ng Anti-Money laundering Act of 2001 at 31 bilang ng paglabag sa Section 4(d) laban kay Guo, ang umano’y ama at ina na si Jian Zhong Guo at Lin Wenyi, at mga kapatid na sina Shiela Gui at Seimen Guo danil sa pagsasabwatan para makagawa ng money laundering.

Sinabi ni DOJ Spokesperson Mico Clavano na napatunayan na umabot sa bilyon-bilyon ang halaga na nasamsam ng mga akusado dahil sa illegal activities partikular sa sinalakay na POGO hub sa Tarlac na pag-aari ni Guo.

Kasama rin sa kinasuhan ng DOJ sina Huang Zhiyang, ang tinaguriang “boss of all bosses” ng illegal POGOs, si dating Technology and Livelihood Resource Center deputy director general Dennis Cunanan, Baoying Lin, Ruijin Zhang, Walter Wong, Jack Uy, Rachel Carreon, Thelma Laranan, Rowena Evangelista, Rita Yturralde, Merlie Castro, Yu Zheng Can, Mariela Tulio, Jaimielyn Cruz, Roderick Pujante, Juan Alpas, Bernard Chua Chua, Wuli Dong, Wang Weili Nong Ding Chang, Lang Xu Po, Ma Pong, Huang Yue Hai, Shicong Zhang, Ma Tram at Maybeline Millo.

Nakatakdang isampa sa Manila RTC ang mga kaso.

Samantala, ibinasura ng panel ang reklamong money laundering laban kay Cassandra Li Ong, ang authorized representative ng Porac POGO hub. Abswelto rin sina Atty. Jason Masuerte at Nancy Gamo dahil sa mahinang ebidensya laban sa kanila. Teresa Tavares