MANILA, Philippines – May kabuuang 196 na lugar ang isinailalim na ngayon sa state of calamity dahil sa pinagsamang epekto ng Bagyong Egay at Southwest Monsoon (Habagat), ayon sa National Disaster Risk Reduction and Management Council (NDRRMC) nitong Huwebes.
Ang pinakahuling situational report ng NDRRMC ay nagpakita na ang Rehiyon ng Ilocos ang may pinakamaraming probinsya, lungsod, at munisipalidad na isinailalim sa state of calamity sa 62.
Sumunod naman ang Cordillera Administrative Region (CAR) na may 44. Sinundan ito ng Central Luzon na may 36; Cagayan Valley na may 29; Calabarzon na may 23; at Mimaropa na may dalawa.
Dalawampu’t pitong tao na rin ang naiulat na namatay dahil sa gulo ng panahon—kung saan dalawa ang kumpirmado, habang ang natitirang 25 ay sumasailalim pa sa validation, ayon sa NDRRMC.
Labintatlo pa rin ang naiulat na nawawala, habang 140 pa ang nasugatan.
Ang mga epekto ng Egay at ng Habagat ay nakaapekto sa 2.9 milyong katao o mahigit 781,000 pamilya sa 4,748 barangay sa buong bansa.
Sa nasabing bilang, 57,532 na mga displaced na indibidwal o 15,552 pamilya ang inilipat sa 656 evacuation centers, habang 230,507 katao o 57,153 pamilya ang nananatili sa ibang lugar sa labas ng evacuation centers.
Sinabi ng NDRRMC na 55,584 na bahay ang nasira—53,358 dito ang nagtamo ng partial damage, habang 2,226 ang totally damaged.
Umakyat din sa P3,550,643,255 ang tinatayang halaga ng pinsala sa 497 imprastraktura, habang P1,911,534,492 ang pinsala sa agrikultura.
Ang National Irrigation Administration, samantala, ay nag-ulat ng kabuuang P11,431,000 halaga ng pinsala sa Mimaropa.
May 51 kalsada at tatlong tulay na hindi pa rin madaanan dahil sa sama ng panahon.
Sinabi ng NDRRMC na mahigit P239.2 milyong halaga ng tulong—binubuo ng tulong pinansyal, food packs ng pamilya, hygiene kits, at sleeping kits, bukod sa iba pa—ay naibigay na sa mga apektadong rehiyon. RNT
