MANILA, Philippines – Sinabi ng Bureau of Immigration (BI) nitong Martes, Disyembre 3 na plano nitong maghain ng mga reklamo laban kay dating presidential spokesperson Harry Roque dahil sa umano’y pag-alis ng Pilipinas sa illegal na pamamaraan.
Ito ay kasunod ng pagpapasa ng kampo ni Roque ng counter-affidavit kaugnay sa trafficking complaint na inihain laban sa kanya, na ni-notaryo sa Abu Dhabi, UAE.
“He most probably falsified immigration clearances to be accepted by his destination country,” saad sa pahayag ni Immigration Commissioner Joel Anthony Viado.
Anang opisyal, maaaring maharap si Roque sa reklamong falsification of public documents.
Dagdag pa ng BI, nakita si Roque na walang attempt ng pag-alis sa bansa sa pamamagitan ng formal channels.
Ang pinakahuling record nito nang pagbiyahe ay noong Hulyo nang dumating ito mula Los Angeles, California.
“Flight is an evidence of guilt. He likely left the country via illegal means, possibly aided by unscrupulous individuals,” ani Viado.
“It’s impossible that he left via formal ports. His name is in the BI’s Lookout Bulletin, and he is a very well-known public figure. You can spot him miles away,” dagdag pa niya.
Nakikipag-ugnayan na ang BI sa Philippine Embassy sa Abu Dhabi.
Sinabi naman ni Prosecutor General Richard Fadullon na ang counter-affidavit sa qualified trafficking complaint na inihain laban kay Roque sa Department of Justice ay nai-subscribe sa Abu Dhabi noong Nobyembre 29.
