Manila, Philippines – Naloka pero naaliw si Herlene Budol sa isang male contestant na tinawag niya para sa palaro sa piyesta sa Cagayan de Oro kamakailan.
Naka-post ang video sa Facebook page ng Kapuso comedienne.
Isa si Herlene sa mga celebrity na naimbitahang magbigay ng kasiyahan sa piyesta ng naturang lalawigan.
Naisip ni Herlene na magpa-games kaya nagtawag siya ng mga lalaking maglalaro.
Isa-isa niyang tinawag ang mga ito.
Siyempre, hindi mawawala ang maikling interbyuhan.
Nagkataong isa sa mga contestant doon ay isang matandang lalaking walang ngipin.
Kinapanayam muna ni Herlene si tatang.
Tanong ng sexy comedienne: “Ano’ng unang kakainin mo pag nagkangipin ka?”
Mukhang ismarte naman si tatang na sumagot ng: “Siyempre…ikaw!”
Tawanan at sigawan ang mga taong nakapalibot sa entablado.
Nawindang man ay kitang-kitang naaliw si Herlene sa sagot ng matandang lalaki.
Hindi ito kinakitaan ng pagkapikon o pagkainis, na lalong ikinahanga sa kanya ng mga tagaroon.
Bumaha rin ng mga panunukso kay Herlene ang FB Page niya, kasabay ng pagkabilib sa pagiging sport nito na nagpasaya sa mga residente doon.
Taun-taon na kayang malimbitahan si Herlene sa CDO? Ronnie Carrasco IIi
