MANILA, Philippines – Naglabas ng show-cause orders ang Senate impeachment court laban sa ilang miyembro ng House prosecution panel dahil sa posibleng paglabag sa sub judice rule, ayon kay Presiding Officer Chiz Escudero nitong Miyerkules, Setyembre 16.
“Before we adjourn today’s trial, the presiding officer, in accordance with the court’s 26 August 2026 directive regarding the strict enforcement of Rule 18 of the Rules of Procedure in impeachment trial on sub judice, the court issued show-cause orders to certain members of the House prosecution panel,” ani Escudero.
Ginawa ni Escudero ang direktiba sa ika-25 araw ng impeachment trial laban kay Vice President Sara Duterte. Inatasan ang clerk of court na i-serve ang mga order pagkatapos ng trial nitong Miyerkules.
Noong Agosto 26, nagtakda si Escudero ng malinaw na guidelines sa sub judice rule.
Ipinagbabawal ng patakaran ang parehong prosecution at defense teams, ang kanilang mga testigo, ang respondent, at ang mga senator-judge na magbigay ng pampublikong komento tungkol sa merito ng nakabinbing kaso.
Batay sa ruling, ang mga lalabag sa sub judice rule ay haharap sa public reprimand na may admonition sa unang paglabag. Maaaring patawan ng multang P30,000, na may posibilidad na pagbawalan sa pagsasalita, pagtutol o pagtatanong sa mga testigo sa plenaryo, sa mga susunod na paglabag.
Sa ngayon, hindi pa pinangalanan ni Escudero kung sino ang mga sinasabing lumabag. Ernie Reyes
