MANILA, Philippines – Mas maraming pulis – kabilang ang mga “general” – ang iniimbestigahan ng National Police Commission (Napolcom) kaugnay sa pagdukot sa missing sabungeros.
“There are many other names who have yet to surface, whom we are investigating, and there are many other names with high ranks whom we are looking into,” ayon kay Napolcom Vice Chairperson Rafael Calinisan.
Nang tanungin kung ano ang pinakamataas na ranggo ng mga opisyal na iniimbestigahan, sumagot si Calinisan, “Heneral.”
Tumanggi ang Napolcom vice chair na pangalanan ang mga ito.
“There’d be hints. Allow us to investigate. Many are trying to stir the pot, and many are trying to interfere. If I say the ranks of those generals, many will try to step in,” saad ni Calinisan.
Noong Hulyo 29, nagsampa ng administrative charges ang Napolcom laban sa 12 aktibong pulis na umano’y sangkot sa umano’y mga kidnapping at iniulat na pagpatay sa mga sabungero.
Isinailalim sa restrictive custody ang 12 opisyal, kinumpirma ni Philippine National Police Chief Gen. Nicolas Torre III noong Hulyo 7.
Tinanong din si Torre kung alinman sa 12 pulis ang tumestigo sa mga kaso at sumagot siya: “Someone tried, but the person backed out.”
Nauna nang ibinunyag ng Napolcom vice chairperson na dalawang hindi pinangalanang grupo ang nagtatangkang impluwensyahan ang imbestigasyon ng ahensya. RNT/MND
