Indo-Pacific Command chief Paparo bibisita sa ilang EDCA sites

MANILA, Philippines- Bibisitahin ni United States Indo-Pacific Command (INDOPACOM) Commander Admiral Samuel Paparo ang ilang sites at isa sa EDCA sites para malaman ang tunay na kalagayan ng mga ito.

Sa isinagawang courtesy call ni Paparo kay Pangulong Ferdinand Marcos Jr. sa Palasyo ng Malakanyang, araw ng Martes, sinabi ng Pangulo na” “I’m glad that you are able to find time to tour with us in the Philippines.”

Sa naging pagbisita ni Paparo, sinabi ng Pangulo na maraming bagay siyang tatalakayin kay Paparo.

“I’m sure we’ll be seeing more of you—, us going to see you and you going to see us. We have a great deal of—, we have many subjects to discuss for the United States and for the Philippines,” ang sinabi ni Pangulong Marcos.

Nilagdaan noong 2014, pinagkalooban ng EDCA ang US troops ng access na mag-designate ng Philippine military facilities, payagan ang mga ito na magtayo ng pasilidad, maglagay ng mga kagamitan, aircraft, at vessels.

Sa kasalukuyan, mayroong siyam na EDCA sites:

• Antonio Bautista Air Base sa Palawan

• Basa Air Base sa Pampanga

• Fort Magsaysay sa Nueva Ecija

• Mactan-Benito Ebuen Air Base sa Cebu

• Lumbia Air Base sa Cagayan de Oro City

• Naval Base Camilo Osias sa Sta Ana, Cagayan

• Lal-lo Airport sa Lal-lo, Cagayan

• Camp Melchor Dela Cruz sa Gamu, Isabela

• Balabac Island sa Palawan

Matatandaang buwan ng Mayo ng taong kasalukuyan, nangako si Paparo na nakahanda ang US military para depensahan ang rehiyon laban sa mga banta sa kapayapaan at katatagan sa gitna ng agresyon ng Tsina sa South China Sea.

Winika ni Paparo na makikipagtulungan ang command sa mga kaalyado at partners para ipreserba ang malaya at bukas na Indo-Pacific.

“We must be ready to answer PRC’s (People Republic of China’s) increasingly intrusive and expansionist claims in the Indo-Pacific Region,” ang sinabi ni Paparo kasunod ng INDOPACOM Change of Command sa Joint Base Pearl Harbor-Hickam sa Hawaii.

Sa gitna ng sigalot sa pagitan ng dalawang bansa, si Pangulong Marcos ang kauna-unahang Pangulo ng Pilipinas noong Nobyembre ng nakaraang taon na bumisita sa US Indo-Pacific Command. Kris Jose