Isa patay, P28.5M shabu nasamsam sa Paranaque buy-bust

MANILA, Philippines – SUGATAN ang apat na PDEA intelligence officers at patay ang suspek na nakipagbarilan sa buy bust operation sa Goodwill 3 village, Bgy. San Antonio, Parañaque City nitong gabi ng Miyerkules, Abril 9.

Dakong 5:30 hapon ng Abril 9, 2024 sa #506 A, Aster Street, Goodwill 3 village, Brgy San Antonio, Parañaque City nang ikasa ng Operating Unit na PDEA NCR ang buy bust operation na nagresulta sa armed encounter.

Kinilala ang napatay sa enkwentro na target ng buy bust na isang alyas Sadam na umano ay taga-Datu Odin Sinsuat sa Mindanao.

Samantala, dinala ang apat na sugatang PDEA intelligence officers sa kalapit na Parañaque Medical Center upang lapatan ng lunas.

Naaresto naman ang asawa ni Sadam na si alyas Lalaine Pidodido, at ang dalawang lalaking katulong sa bahay na sina alyas Aladin Salipad at Binladin Untog.

Nakumpiskang ebidensya ang apat na paketeng naglalaman ng sachets na mayroong hinihinalang shabu na tinatayang may kabuang apat na kilo at may street value na kabuuang P27.2 milyon.

Nakuha rin ang isang kalibre .45 na baril, anim na live ammunitions, isang magazine, dalawang cellphone, isang weighing scale, humigit kumulang sa dalawang milyong pisong boodle money.

Kasalukuyan namang sinusuri ang mga financial transactions ng grupo makaraang makuha ang checkbook ng isang malaking banko sa bansa.

Samantala, nasa pangangalaga at imbestigasyon ng scene of crime operations ang dalawang kotse na umano’y pag-aari ni Sadam.

Kabilang sa iniimbestigahan ang .9 mm na baril at 23 basyong bala na narecover sa crime scene. Dave Baluyot