Kaliwa’t kanang kilos-protesta sa Maynila, Makati ikinasa sa Int’l Human Rights Day

MANILA, Philippines – Sinabayan ng kaliwa’t-kanang kilos protesta ang pagdiriwang ng International Human Rights Day ngayong araw.

Panawagan ng ilang sektor na nagtipon-tipon sa Mendiola Bridge na tuldukan na ang matinding korapsyon at pagmamalabis sa ilalim ng pamumuno ng kasalukuyang administrasyon.

Pinangunahan ang rally ng mga grupong Bagong Alyansang Makabayan o Bayan, at ng Philippine Alliance of Human Rights Advocates o PAHRA.

Ang grupo ng Karapatan at Bayan naman ay nagsagawa ng programa sa Liwasang Bonifacio.

Kinondena ng mga raliyista ang umano’y korupsiyon, paghihirap ng mamamayan, at patuloy na paglabag sa karapatang pantao.

Bukod dito, tila hindi rin umano natutuldukan ang ginagawang pagmamalabis ng mga namumuno at opisyal ng gobyerno kaya marami na rin ang umaalma.

Nanawagan din sila ng panagutan sa administrasyon nina Pangulong Ferdinand Marcos Jr. at Bise Presidente Sara Duterte, na anila’y bigo umanong tugunan ang kahirapan, pagtaas ng presyo ng bilihin, at mga isyu sa karapatan at soberanya ng bansa. Jocelyn Tabangcura-Domenden