MANILA, Philippines – Muling nananawagan ang Kawasaki Motors Philippines Corporation (KMPC) ng pagkakaisa at pang-unawa sa mga lider ng Kawasaki United Labor Union (KULU) na ngayon ay nasa ika-36 araw na ng kanilang pagwewelga kasunod ng deadlock sa Collective Bargaining Agreement (CBA).
Nababahala ang KMPC na tuluyan nang mauwi sa layoffs o pagkawala ng trabaho sa daan-daang nilang empleyado ang patuloy na strike.
“The continued work stoppage has resulted in serious operational disruptions, reputational harm, and significant financial losses—placing the livelihood of hundreds of employees at risk, not only to the union members, but to other employees as well,” ayon sa KMPC.
Mayo 21, 2025 nang simulan ng KULU ang strike na kanilang isinasagawa sa planta ng KMPC sa Cupang, Muntinlupa City.
Ang deadlock ay resulta ng pagtanggi ng KULU sa alok na 5% salary increase.
Iginigiit ng KULU na ang bawat miyembro ng kanilang unyon ay nangangailangan ng P80,000 kada buwan na sahod para suportahan ang basic needs ng kanilang pamilya. Ito ang dahilan kung bakit 11.5% na salary increase ang hinihingi ng labor union.
Gayunpaman, sa panig ng management, ipinaliwanag ng KMPC na hindi nito kayang pagbigyan ang mataas na dagdag-sahod sa harap na rin ng sunud-sunod na financial losses ng kumpanya na nagsimula noong pandemya.
Depensa ng KMPC, ang sahod ng kanilang rank-and-file employees ay higit na mataas kumpara sa ibang manggagawa sa parehong industriya, resulta umano ito ng 10% na annual salary increase na iniimplementa ng KMPC sa loob ng nakalipas na dalawang dekada.
Iginiit ng KMPC na kung ibibigay nila ang bagong “demand” ng unyon base sa kanilang sitwasyon sa kasalukuyan, ay hindi malayong mangyari na tuluyang bumagsak ang kumpanya.
“While we empathize with the workers’ demands, the company’s current financial state makes further concessions unsustainable. Granting the union’s full 11.5% demand could place the company’s long-term viability at risk,” paliwanag pa ng kumpanya.
Sa dalawang pahinang manifestation na isinumite ng KMPC sa Department of Labor and Employment (DOLE), kinondena ng KMPC ang hindi makatarungang taktika ng unyon, kabilang na ang online attacks sa mga opisyal ng kumpanya, gayundin ang pagpapakalat ng mapanlinlang na impormasyon sa iba’t ibang non-governmental organizations (NGOs) at mga labor group upang makuha ang simpatiya ng publiko.
“Dragging the company’s name through the mud just to gain public sympathy is not only unfair—it is irresponsible. These one-sided narratives have already damaged our sales and strained relationships with stakeholders,” ayon sa KMPC.
Ayon sa KMPC, sa mga ulat na ito ay maling isinalarawan ang kumpanya bilang mapang-abuso at lumalabag sa mga batas paggawa ng Pilipinas.
“Such tactics go against the spirit of good faith negotiations and have disrupted the harmony we’ve maintained for decades. We all understand how much Japanese corporate culture values discretion and mutual respect. These actions have damaged that trust,” giit pa ng KMPC.
Bukas pa rin ang KMPC sa voluntary arbitration—isang opsyon na tinanggihan ng unyon sa isang pagdinig sa harap ng National Conciliation and Mediation Board (NCMB)—pati na rin sa assumption of jurisdiction ng kalihim ng Department of Labor and Employment.
Patuloy ang pagnanais ng KMPC na maresolba ang deadlock. Gayunpaman, kinumpirma nito na natapos na nila ang mga legal na proseso para sa lockout at handang ipagtanggol ang interes ng kumpanya kung kinakailangan.
Aminado ang kumpanya na kanila ring ikinokonsidera ang pagsasampa ng legal na kaso laban sa mga nasa likod ng paninira sa KMPC.
Ang KMPC, na subsidiary ng Kawasaki Motors, Ltd. (KMC) at Kawasaki Heavy Industries, Ltd. ng Japan, ay 60 taon nang negosyo sa Pilipinas. Kaya naman ang panawagan ng kumpanya sa KULU ay pag-isipan ang epekto ng kanilang mga aksyon.
“Huwag nating hayaang gibain ng maling impormasyon at labis na kahilingan ang lahat ng ating pinaghirapan sa loob ng maraming dekada,” apela pa ng KMPC.
