MANILA, Philippines – Hindi isinasantabi ng House prosecution panel ang posibilidad na iharap bilang saksi si dating Vice Presidential Security and Protection Group (VPSPG) commander Colonel Raymund Lachica sa impeachment trial ni Vice President Sara Duterte, ayon kay dating Surigao del Norte congressman at prosecution adviser Robert Ace Barbers.
Ayon kay Barbers, hindi pa tinatawag ng prosecution si Lachica dahil hindi pa nila kinakailangan ang kanyang testimonya. Ngunit maaari itong magbago kung kailangan nila ng karagdagang ebidensya tungkol sa umano’y maling paggamit ng confidential funds ng Office of the Vice President (OVP).
“Hindi sarado ang aming isipan para ipresenta si Colonel Lachica. Kung naniniwala kami na mayroong kakulangan o kinakailangan pang madagdagan ang evidentiary value or puwedeng sumuporta sa aming allegations, bakit hindi?” ani Barbers.
Tinanong si Barbers kung nangangamba silang akuin ni Lachica ang buong responsibilidad sa umano’y maling paggamit ng pondo. Sinabi niyang handa sila sa ganoong posibilidad.
“Kung sakaling ‘yan ang kanyang gagawin, it doesn’t give us any evidentiary value doon sa allegations namin. Problema niya ‘yun. Kung ‘yun ang gagawin niya, siya ‘yung mananagot sa batas,” aniya.
Nasa listahan din ng mga saksi ng defense si Lachica. Dahil dito, sinabi ni Barbers na handa ang prosecution na i-cross-examine siya kung haharap siya sa Senate impeachment court.
Sa hearing noong Agosto 17, sinabi ni dating OVP Special Disbursing Officer Gina Acosta na si Duterte mismo ang nag-utos sa kanya na maglabas ng ₱125 milyon na confidential funds para kay Lachica.
Noong Agosto 25 naman, sinabi ni Lachica na handa siyang humarap sa Senate impeachment court “to tell the truth, subject to applicable laws and security restrictions.”
Samantala, sinabi ni Barbers na may apat pang saksi na ihaharap ang prosecution sa mga susunod na araw ng paglilitis—tatlong opisyal mula sa Armed Forces of the Philippines (AFP) at defense counsel Michael Poa.
Itatalaga si Poa bilang hostile witness ng prosecution. RNT/MDS
