MANILA, Philippines — Hindi na maniningil ang state-run Land Bank of the Philippines ng interbank transfer fees simula Martes, Hulyo 7, 2026, kaya makapagpapadala na ng pera nang walang bayad ang mga kliyente nito, kabilang ang mga kliyente ng Overseas Filipino Bank.
Sa isang advisory, sinabi ng LandBank na aalisin nito ang fees para sa InstaPay at PESONet transfers, gayundin ang fees para sa retail transactions at person-to-government transactions gamit ang QRPh.
“By expanding our zero-free digital framework from government payments to everyday retail transfers, we want to ensure that our banking services directly uplift our workers, small business owners, and overseas Filipinos,” pahayag ni LandBank president and chief executive officer Lynette Ortiz.
“Our focus remains on keeping our platforms secure, reliable, and accessible to everyone, helping our clients stay connected to their families and businesses without the burden of extra costs,” dagdag niya.
Kasunod ito ng Bangko Sentral ng Pilipinas Circular 1238, na nagkabisa noong Hulyo 4 at nagsasaad na anumang diperensiya sa singil sa intrabank at interbank transfers ay dapat nakabatay lamang sa aktuwal na “switch cost,” o gastos sa pagproseso ng transaksyon sa pamamagitan ng payment network.
Tinatayang nasa P1.50 ang switch cost, kaya ang mga bangkong libre na ang intrabank transfers ay maaari lamang maningil ng hanggang P1.50 para sa interbank transfers.
Nauna nang inanunsyo ng ilang bangko ang pagtanggal ng interbank transfer fees, kabilang ang Ayala-led BPI, na permanenteng nag-alis ng fees sa InstaPay at PESONet transactions simula Hulyo 1, 2026, at Rizal Commercial Banking Corp., na ginawang libre ang InstaPay transfers simula Hulyo 4.
Gayunman, nagtakda ang RCBC ng limit na 30 free transfers kada buwan na may minimum transaction amount na P100. Maniningil ito ng P10 kapag naabot na ang monthly limit o kung mas mababa sa minimum amount ang transaksyon.
“We said that’s not compliant…. All we say is that whatever you charge, the price of your off-us [interbank] transaction must be the same as your on-us [intrabank]. It cannot be more than your on-us price plus the switch fee,” pahayag ni BSP Deputy Governor Mamerto Tangonan.
Ang InstaPay, isang electronic fund transfer payment system na nagpapahintulot ng real-time fund transfers sa pagitan ng mga bangko, ay inilunsad ng BSP noong 2018. RNT
