ILOCOS NORTE- Arestado ang lider ng New People’s Army sa pinaigting na operasyon ng militar at pulisya, kahapon sa bayan ng Bacarra.
Kinilala ni Major Gen. Gulliver L. Señires, commander ng 5th Infantry Division ang nadakip na si Simon Fiaryao Naogsan Sr., alyas Filiw at Wayat, miyembro ng executive committee, pinuno ng regional propaganda, at dating kalihim ng Kilusang Larangang Guerilla-Marco sa ilalim ng Ilocos-Cordillera Regional Committee na nahaharap sa mga kaso ng pagpatay at tangkang pagpatay sa regional trial court sa Ifugao at Mountain Province, tagapagsalita din ng Communist Party of the Philippines (CPP) sa Ilocos-Cordillera region
Nadakip si Naogsan Sr., sa Bacarra, Ilocos Norte noong Lunes, Oktubre 21, 2024, kasunod ng pagkakahuli kamakailan sa tatlong matataas na miyembro ng ICRC sa Conner, lalawigan ng Apayao.
“Ang tagumpay ng operasyong ito ay isang patunay sa dedikasyon ng ating mga tropa at sa walang patid na suporta ng komunidad,” ani Señires.
“Ang napakahalagang impormasyon na ibinigay ng mga residente ay napakahalaga sa pagsubaybay kay Naogsan at pagtiyak sa kanyang pag-aresto. Ito ay nagpapakita ng lumalagong pakikipagtulungan sa pagitan ng militar at ng komunidad at ang lumiliit na suporta para sa mga rebeldeng komunista dahil sa pinabuting serbisyo sa Geographically Isolated and Disadvantaged Conflict-Affected Areas (GIDCAs).”
Iniugnay ni Señires ang lumiliit na impluwensya ng NPA sa Northern Luzon sa whole-of-nation approach sa ilalim ng National Task Force to End Local Communist Armed Conflict (NTF-ELCAC).
Iimbestigahan na din ng tanggapan ni Police Col. Frederick E. Obar, Ilocos Norte police director, ang presensya ng Naogsan sa Ilocos Norte. Mary Anne Sapico
