MANILA, Philippines – Plano ng Philippine National Police sa National Capital Region (NCRPO) na magpatupad ng liquor ban at pansamantalang suspensyon ng permits to carry firearms upang masiguro ang kaligtasan ng mamamayan sa Traslacion sa Biyernes, Enero 9 para sa Pista ng Jesus Nazareno.
Sa press briefing nitong Lunes, Enero 5, sinabi ni NCRPO chief Police Major General Anthony Aberin na humiling na sila sa lokal na pamahalaan ng Maynila at sa PNP national headquarters.
“Of course, kasama sa ordinansa na ipapatupad po natin ay yung pag-inom. And as a matter of fact, ni-request po natin sa City Government of Manila na magkaroon po ng liquor ban during the activity,” ani Aberin.
“We have also requested the national headquarters for the suspension of the permit to carry firearms outside of residence (PTCFOR), effective January 8 to January 10,” dagdag pa nito.
Bukod sa nasabing mga hakbang, sinabi ni Aberin na humiling din ang pulisya sa National Telecommunications Commission (NTC) na magpatupad ng signal disruptions sa lugar na sakop ng Traslacion.
Nag-request na rin aniya ng no-fly zone sa mga nasabing lugar mula sa Civil Aviation Authority of the Philippines (CAAP).
Nauna nang sinabi ng PNP na mayroong 15,000 pulis an ipakakalat upang magbigay-kaligtasan sa aktibidad. RNT/JGC
