MANILA, Philippines – Sinsupinde na ng Land Transportation Office (LTO) ang lisensya ng truck driver na sangkot sa karambola sa C5 road sa Taguig na kumitil sa buhay ng isang tao at ikinasugat ng dalawa iba pa.
Sa pahayag na inilabas nitong Sabado, Disyembre 21, inanunsyo ng LTO na ang driver’s license nito ay suspendido ng 90 araw, habang ang trak na sangkot sa insidente ay ilalagay sa “under alarm” habang isinasagawa pa rin ang imbestigasyon.
“We have issued a Show Cause Order to both the driver and the registered owner of the truck, requiring them to explain why they should not face penalties under existing laws and traffic regulations,” ayon kay LTO Assistant Secretary Vigor Mendoza.
Inatasan ang drayber na magbigay ng notarized explanation para ipaliwanag kung bakit hindi ito dapat bawian ng lisensya.
Pinagpapaliwanag din ang may-ari ng trak kung bakit hindi dapat ito panagutin ng administratibo dahil sa pagkuha ng isang reckless driver.
Inatasan ang kapwa partido na magtungo sa LTO Central Office sa Quezon City noong Disyembre 27 para ipakita ang kanilang written explanations.
“Failure to appear and submit your written response will compel this Office to resolve the matter based on the available evidence on record,” saad sa kautusan. RNT/JGC
