MANILA, Philippines- Hindi na papayagan ang karagdagang motorcycle taxis sa Metro Manila, ayon kay Department of Transportation Secretary Jaime J. Bautista sa gitna ng pangamba ng negatibong epekto nito sa trapiko sakaling dagdagan ng gobyerno ang bilang.
Inihayag ang pagkabahala nitong mga nakalipas na araw matapos iulat ng LTFRB na naglaan ito ng tig-2,000 slots para sa apat na bagong players na binigyan hanggang April 15 upang makumpleto ang alokasyon.
Kasunod ito ng ulat na inanunsyo umano ni LTFRB chairman Teofilo Guadiz III magkakaroon ng moratorium sa pagpapalawig ng motorcycle taxis.
Sa panayam, sinabi ni Bautista na bibiyahe ang 8,000 slots na inaprubahan ng Land Transportation Franchising and Regulatory Board (LTFRB) sa labas ng Metro Manila.
“The LTFRB will stop adding the motorcycle taxi units in Metro Manila. The eight thousand slots for new players recently announced were intended only in the provinces,” wika ni Bautista.
Nagkaroon ng paglilinaw sa gitna ng mga debate at panawagan kamakailan para sa moratorium sa motorcycle taxi expansion sa metropolitan area.
Partikular na isinusulong ng House Committee on Metro Manila Development, sa pakikipag-ugnayan sa transport groups, ang pansamantalang pagpapatigil sa MC taxi expansion.
“This decision aligns with the department’s vision to balance transportation services across different regions while addressing the specific needs and challenges of each area,” giit ni Bautista.
“By redirecting additional MC taxi units outside of Metro Manila, the DOTR aims to alleviate congestion and enhance mobility in the capital region,” dagdag ng opisyal. RNT/SA
