MANILA, Philippines- Maaaring mapaigting ng militarisasyon ng ng United States sa Batanes Island ang regional tensions sa West Philippine Sea, ayon kay House Deputy Minority Leader Rep. France Castro nitong Linggo.
Kinondena ni Castro ang “military transformation” ng inilarawan niyang “idyllic” na isla, at inihayag ang pagkabahala na maaaring maging potensyal na target ang Batanes bilang forward base para sa US sakaling sumiklab ang kaguluhan sa pagitan ng China at Taiwan.
“If this happens or if China escalates its aggression in the West Philippine Sea then we would be right smack in the middle of an inter-imperialist war, making the Philippines the theater of war in Southeast Asia,” pahayag ng mambabatas.
Ang Batanes ang northernmost municipality sa bansa at pinakamalapit sa Taiwan.
Naiulat na dalawang ranking US Army engineers ang dumating sa Batanes nitong Biyernes upang paghandaan ang konstruksyon ng humanitarian logistics warehouse bilang bahagi ng “Balikatan” military exercises ngayong taon sa pagitan ng mga sundalong Amerikano at Pilipino.
Kasado ang Balikatan exercises mula April 22 hanggang May 10, kung saan may kabuuang 16,000 sundalo mula sa dalawang bansa ang inaasahang makikilahok.
Base kay Castro, “this development, unprecedented in the history of Batanes, signifies a significant shift from the province’s traditional role as a peaceful and rural area to one with strategic and geopolitical military interests.”
Binigyang-diin din niya ang pangangailangan para sa pagbusisi sa “long-term consequences” ng nasabing militarization efforts sa pagpapairal ng kapayapaan at kaayusan sa rehiyon.
Samantala, 29 sundalo mula sa US Department of Defense at Department of the Army ang inaasahang darating sa Batanes sa mga susunod na araw habang nasa 15 Philippine Army engineers ang makikiisa sa konstruksyon ng humanitarian and disaster relief warehouse sa isla. Inaasahang magpapatuloy ang kontruksyon hanggang Hunyo. RNT/SA
