MANILA, Philippines —Nangunguna sa mga “most complained” na ahensya ng pamahalaan ang Land Transportation Office (LTO) at Social Security System (SSS) batay sa datos ng Anti-Red Tape Authority (ARTA) hanggang Marso 2026.
Ayon sa ARTA, umabot sa 152 ang kabuuang reklamo, kung saan 132 na ang naresolba habang 20 pa ang aktibo. Sa SSS naman, naitala ang 156 na reklamo, 112 dito ang naresolba at 44 pa ang nakabinbin.
Sinabi ni ARTA Secretary Ernesto Perez na karaniwang reklamo ang delay sa pagproseso ng aplikasyon, karagdagang requirements, at paglabag sa Citizen’s Charter.
“We are also looking forward towards more engagement with the LTO and those other complained agencies para po mabawasan na rin ang complaints (to reduce the complaints),” ani Perez sa isang Palace briefing nitong Martes.
“Ang message po natin dito is we continuously engage with these government agencies. We consider them as partners, hindi po natin sila kalaban. Ang atin pong objective ay hindi sila para makasuhan kung hindi mapaganda po ang serbisyo para sa tao,” dagdag niya.
Kabilang pa sa may mataas na bilang ng reklamo ang Bureau of Internal Revenue (BIR), Food and Drug Administration (FDA), Land Registration Authority (LRA), Philippine Statistics Authority (PSA), Department of Education (DepEd), National Telecommunications Commission (NTC), Department of Migrant Workers (DMW), Professional Regulation Commission (PRC), Department of Human Settlements and Urban Development (DHSUD), at Department of Science and Technology (DOST).
Sa mga government-owned and controlled corporations, kabilang sa may pinakamaraming reklamo ang Pag-IBIG Fund, Philippine Health Insurance Corporation (PhilHealth), Landbank of the Philippines, Government Service Insurance System (GSIS), at Philippine Postal Corporation.
Gayunman, sinabi ni Perez na bumaba ang bilang ng red tape cases, kung saan mahigit 90 porsyento ng mga reklamo ay naresolba na.
“Significant decrease, in fact, even President Marcos, in his message to ARTA, in our accomplishment report, recognized the big role that ARTA is doing towards improving service efficiency,” ani Perez.
Ipinabatid din ng ARTA ang mga bagong inisyatiba tulad ng “Tala,” isang artificial intelligence system na magbibigay ng real-time updates sa mga serbisyo ng pamahalaan.
Tinutulak din ng ahensya ang full implementation ng electronic business one-stop shops sa lahat ng LGU at isang central business portal upang mapabilis ang pagproseso ng permits at licenses, na layong pagandahin ang business climate at makahikayat ng mas maraming investments. Santi Celario
