MANILA, Philippines – Muling magpapaulan ang habagat sa ilang bahagi ng Luzon at Visayas ngayong Huwebes, iniulat ng PAGASA.
Patuloy ding binabantayan ng weather bureau ang Bagyong Khanun (dating Falcon), na nasa labas ng Philippine Area of Responsibility (PAR), na matatagpuan sa layong 715 kilometro hilaga hilagang-silangan ng Itbayat, Batanes na taglay ang maximum sustained winds na 155 kilometers per hour malapit sa gitna, pagbugsong aabot sa 190 km/h at kumikilos pakanluran hilagang-kanluran sa bilis na 10 km/h.
Ang Ilocos Region, Zambales, at Bataan ay magkakaroon ng paminsan-minsang pag-ulan dahil sa habagat. Maaaring magkaroon ng pagbaha o pagguho ng lupa sa mga lugar na ito dahil sa katamtaman hanggang sa malakas na pag-ulan.
Ang Metro Manila, Cordillera Administrative Region, Cagayan Valley, CALABARZON, MIMAROPA, at ang nalalabing bahagi ng Central Luzon ay magkakaroon ng maulap na papawirin na may kalat-kalat na mga pag-ulan at pagkidlat-pagkulog dahil din sa habagat na may posibilidad na biglaang pagbaha o pagguho ng lupa dahil sa katamtaman hanggang sa sa beses na malakas ang ulan.
Ang nalalabing bahagi ng bansa ay magkakaroon ng bahagyang maulap hanggang sa maulap na papawirin na may pulu-pulong mga pag-ulan o pagkidlat-pagkulog dahil sa habagat at mga localized na thunderstorm. Ang mga flash flood o landslide ay maaaring mangyari sa panahon ng matinding bagyo.
Sumikat ang araw bandang 5:40 a.m., habang lulubog ito ng 6:25 p.m. RNT
