MANILA, Philippines – Magpapakalat ang Philippine National Police–National Capital Region Police Office (PNP-NCRPO) ng 9,553 pulis sa Metro Manila para tiyakin ang seguridad sa White Ribbon March sa Linggo, Hunyo 28.
Ayon kay NCRPO spokesperson Maj. Hazel Asilo, bahagi ito ng kanilang preventive security measures.
“There is no threat. This is our proactive deployment,” ani Asilo.
Lalahukan ng ilang religious at civil society groups ang White Ribbon March sa Epifanio delos Santos Avenue (Edsa) People Power Monument upang manawagan ng pananagutan ng mga opisyal ng pamahalaan at mga reporma.
Nauna nang sinabi ni Bishop Efraim Tendero na isusulong sa martsa ang pagpapanagot sa mga tiwaling opisyal, pagpasa ng isang tunay na anti-dynasty law, at reporma sa electoral process.
Nauna ring iniatas ni PNP chief Gen. Jose Melencio Nartatez Jr. sa NCRPO na magsagawa ng security assessment sa paligid ng People Power Monument at iba pang kritikal na imprastraktura bago ang pagtitipon. Santi Celario
