MANILA, Philippines – Iminumungkahi ng Department of Trade and Industry (DTI) na gawing mandatory ang certification para sa mga solar power system products na ibinebenta sa Pilipinas.
Ayon kay Trade Secretary Maria Cristina Roque, layunin ng panukala na tiyakin na ang mga solar energy system ay sumusunod sa Philippine National Standards (PNS) upang masiguro ang kaligtasan, tibay, at kalidad ng mga produkto.
Paliwanag niya, habang dumarami ang mga Pilipinong gumagamit ng solar energy para makatipid sa kuryente, mahalagang masigurong hindi mapupunta sa merkado ang mga substandard o hindi ligtas na produkto.
Dagdag pa ng DTI, layunin din ng regulasyon na maiwasan ang pagpasok sa bansa ng mga mababang kalidad na solar products na tinanggihan na sa ibang bansa.
Sinabi rin ng ahensya na kikilalanin ang mga test report mula sa mga accredited testing laboratories, at hindi sakop ng panukala ang mismong installation o pagkakabit ng solar systems.
Bukas ang DTI sa mga komento at suhestiyon ng publiko hanggang Hulyo 25, 2026 sa kanilang email address na ibinigay ng ahensya.
Sa kabuuan, layunin ng panukala na protektahan ang mga konsyumer at palakasin ang tiwala sa paggamit ng renewable energy sa bansa. RNT/MND
