MANILA, Philippines- Tinitingnan ng Department of Migrant Workers (DMW) ang pagpapalawak ng mga oportunidad sa trabaho at mas mahusay na proteksyon para sa overseas Filipino workers (OFWs) kasunod ng matagumpay na bilateral meetings nito sa iba’t ibang bansa sa sideline ng Global Labor Market Conference sa Riyadh, Saudi Arabia.
Ibinahagi ni DMW Undersecretary Patricia Yvonne Caunan ang mga pangunahing kasunduan mula sa 10 high-level bilateral meetings na naglalayong palawakin ang mga oportunidad sa trabaho, tiyakin ang etikal na recruitment, pagpapahusay ng mga proteksyon ng manggagawa, at pag-aayon ng mga patakaran sa pandaigdigang pwersa sa paggawa.
Alinsunod ito sa direktiba ni Pangulong Ferdinand Marcos Jr. na palakasin ang bilateral na relasyon upang isulong at protektahan ang mga karapatan at kapakanan ng mga OFW.
“Sampu ang naging kausap ng Department of Migrant Workers nung tayo ay pumunta at dumalo sa Global Labor Market Conference, kasama po dyan ang Kingdom of Saudi Arabia, Finland, the Bahamas, Oman, Jordan, Egypt, Indonesia, Tajikistan, Kyrgyzstan, at Libya. They all expressed their interest in our Filipino skilled workers,” sabi ni Caunan.
Ang DMW at ang nasabing iba’t ibang bansa ay naglalayon na i-explore ang kooperasyon sa paglikha ng isang sustainable workforce sa pamamagitan ng mutual development at pagsasanay ng human resoirces nito at mapadali ang labor mobility at disenteng trabaho sa pagsunod sa mga pamantayan at prinsipyo ng ligtas, maayos, at regular na migration.
Iminungkahi din ng ilang bansa na bumisita sa Pilipinas upang pag-aralan ang programa sa pagtatrabaho sa ibang bansa, ang pinakamahuhusay na kagawian nito sa pagpapadali sa ligtas at etikal na recruitment at deployment ng mga OFW, at ang mga hakbangin nito para labanan ang illegal recruitment.
Ibinahagi rin ni Undersecretary Caunan na ang pagpupulong ay lumikha ng isang potential market para sa Filipino workers na in-demand dahil sa kanilang kakayahan at hindi mapag-aalinlangang likas na malasakit.
Ang mabungang mga talakayan ay sumasalamin sa seryosong pangako ng DMW sa pagpapahusay ng labor cooperation sa iba’t ibang bansa upang higit pang magarantiya ang pinalakas na proteksyon ng mga OFW, partikular ang mga manggagawa sa bulnerableng sektor, at upang itaguyod ang ethical migration sa pandaigdigang labor market.
“The DMW remains steadfast in its mission to elevate the status of Filipino workers worldwide, ensuring they are protected, valued, and provided with dignified employment,” pagtatapos ni Caunan. Jocelyn Tabangcura-Domenden
