Inanunsyo ng Commission on Elections (Comelec) na mas maraming lugar ang ilalagay sa ilalim ng “red” category dahil sa pagtaas ng karahasang kaugnay ng halalan sa darating na Mayo 2025 elections.
Ito ay kasunod ng pamamaril kay Datu Piang, Maguindanao del Sur Vice Mayor Datu Omar Samama noong Lunes, kung saan siya ay nasugatan.
Sa ngayon, 38 lugar ang nasa ilalim ng red category, na nangangahulugang may seryosong banta ng karahasan.
Ayon kay Comelec Chairperson Erwin Garcia, partikular na nakakaalarma ang pagtaas ng insidente sa Cotabato City at Maguindanao, kung saan parehong opisyal ng lokal na pamahalaan at mga kandidato ang nasasangkot, pati na rin ang ilang sibilyan, kabilang ang mga bata.
Bilang tugon, magpapadala ang Comelec ng karagdagang puwersa ng gobyerno at magpapatupad ng hakbang upang maiwasan ang karahasan.
Sa unang linggo ng Marso, bibisita ang Comelec sa Cotabato City para saksihan ang paglagda ng peace covenant sa pagitan ng mga kandidato, grupo, at pamilya sa Maguindanao.
Pinayagan din ng Comelec ang ilang tauhan nito na magdala ng baril para sa kanilang proteksyon, basta’t may kaukulang exemption sa gun ban.
Bilang bahagi ng paghahanda para sa 2025 elections, makikipagpulong ang Comelec sa 40 survey firms para sa mas mahigpit na pagbabantay ng mga survey. RNT
