MANILA, Philippines – Makakatanggap ng mas mataas na sweldo ang mga minimum wage earner sa Northern Mindanao at Caraga simula nitong Mayo 1, kasunod ng bisa ng ikalawang tranche ng pagtaas ng sahod.
Sa Region 10, sasalubungin ng mga manggagawa ang Araw ng Paggawa na may bagong daily minimum wage na mula P485 hanggang P500 matapos ipatupad ang ikalawang tranche na nagkakahalaga ng P14. Ang unang tranche na P25 ay nagtaas ng minimum wage sa P471 hanggang P486 at nagkabisa noong Enero 16, 2026.
Samantala, umabot na sa P475 ang daily minimum wage sa Caraga matapos magkabisa ngayong araw ang ikalawang tranche na P20. Ang unang tranche na P20, na nagtakda ng minimum wage sa P455, ay nagkabisa noong Enero 03, 2026.
Dagdag pa rito, ang ikalawang tranche ng pagtaas ng sahod para sa Regions VIII at IX, na nagkakahalaga ng P18 at P25 ayon sa pagkakabanggit, ay magkakabisa sa Hunyo 1. Ang Regions V at XI ay nakatakda ring makatanggap ng ikalawang tranche ng kanilang wage adjustments mamaya ngayong taon.
Ang NWPC ay nagsasagawa ng napapanahon at regular na pagsusuri ng regional minimum wage rates upang mabawasan ang kawalan ng katiyakan sa ekonomiya at palakasin ang ugnayan ng produktibidad at sustainable na sahod.
Mula nang magsimula ang administrasyon ni Pangulong Marcos, umabot na sa P125 ang kabuuang pagtaas ng minimum wage para sa NCR sa panahong 2023-2025 at mula P80 hanggang P140 sa ibang mga rehiyon.
Labing-anim (16) na wage order para sa mga manggagawa sa pribadong sektor sa lahat ng rehiyon ang nailabas para sa 2025-2026 cycle, na siyang nagtapos sa wage review cycle ng panahong iyon at direktang nakinabang ang 4,694,886 minimum wage earners. Inaasahang magsisimula ang susunod na cycle sa Mayo 2026, o sa loob ng 60 araw bago ang anibersaryo ng wage order ng National Capital Region.
Nananatiling matatag ang DOLE, sa pamamagitan ng NWPC, sa pangako nitong protektahan ang mga bulnerableng manggagawa laban sa napakababang sahod sa pamamagitan ng pagtatakda ng floor wage na nakaangkla sa kasalukuyang kalagayang sosyo-ekonomiko sa mga rehiyon. Jocelyn Tabangcura-Domenden
