MANILA, Philippines – Sinabi ng Department of Labor and Employment sa isang advisory na exempted ang mga empleyado at hindi maaring mamarkahang absent kapag sinamahan ang kanilang mga anak sa mga vaccination center.
“Employers are highly encouraged to allow their employees to be excused from work when they accompany their children on scheduled vaccinations, or when they must take care of their children with adverse effects or reactions to the vaccine on the day after the vaccination,” ayon sa DOLE.
Naglabas ng abiso ang ahensya bilang suporta sa nationwide measles, rubella at oral polio vaccine (MR-OPV) immunization activity ng gobyerno mula Abril 1 hanggang 15.
Sinabi ng DOLE na ang mga empleyado ay kinakailangan lamang na magpakita ng patunay ng pagbabakuna ng kanilang mga anak sa kanilang pagbabalik sa trabaho.
Ang pambansang kampanya ng pagbabakuna ay pinasimulan ng gobyerno bilang tugon sa malaking pagtaas ng mga kaso ng tigdas at rubella sa loob ng bansa.
Sinabi ng DOLE na maaaring payagan ng mga kumpanya ang mga manggagawa na gamitin ang kanilang available na leave credits sa panahon ng immunization campaign period, na napapailalim sa patakaran ng kumpanya o collective bargaining agreement na nagbibigay ng pareho.
Ang advisory ay dapat ilapat sa lahat ng empleyado ng pribadong sektor na may mga anak na may edad na 6–59 na buwan.
Hinihikayat din ang mga kumpanya na magbigay ng impormasyon tungkol sa mga bakuna sa tigdas-rubella at polio sa pamamagitan ng online at offline na mga platform.
Pinayuhan ng DOLE ang mga employer na makipag-ugnayan sa mga health department ng local government units sa nakatakdang immunization para matiyak na kasama ang mga anak ng kanilang mga empleyado sa MR-OPV campaign.
Hinimok din ng ahensya ang mga employer na isaalang-alang ang pag-set up ng mga pansamantalang istasyon ng pagbabakuna sa loob ng kanilang lugar at isama ang occupational health staff sa pangkat ng pagbabakuna, kung magagawa. (Jocelyn Tabangcura-Domenden)
