MANILA, Philippines – Nakabase sa financial records na iniulat ng financial institutions ang nagsasabi sa P4.4 bilyong transaksiyon nina Vice President Sara Duterte at asawa nitong si Atty. Maneses Carpio, ayon sa isang testigo ng impeachment court mula Anti-Money Laundering Council (AMLC).
Sa kanyang testimonya, sinabi ni AMLC Secretariat Executive Director Ronel Buenaventura nitong Martes na wala siyang personal na kaalaman kung nakapag-ipon ng hindi maipaliwanag na yaman si Vice President Duterte dahil limitado lang ang kanyang testimonya sa financial transactions na iniulat sa ahensya.
Bumalik si Buenaventura sa Senate impeachment court bilang prosecution witness habang ipinagpapatuloy ng depensa ang cross-examination.
Tinanong muna ni defense lawyer Atty. Mark Vinluan si Buenaventura tungkol sa tabular summary na iniharap nito noong Lunes, na nagpakita ng P4.4 bilyong financial trail nina Duterte at ng asawa nitong si Atty. Manases Carpio.
“Malaki po ‘yung mga aggregate amounts contained in your tabular summaries. Pero para lang po maliwanag, ‘yung tabular summaries and reports po ba na ‘yun ay conclusive proof of VP Sara and Atty. Mans’ cash on hand or cash in bank?” tanong ni Vinluan.
“No, Your Honor. What the records would only show are the transactions, not the cash in hand or cash in bank,” sagot ni Buenaventura.
Tinanong din siya kung conclusive proof ang summary ng umano’y unexplained wealth ni Duterte. Sinabi ni Buenaventura na base lang ang tabulation sa mga covered transaction reports o CTRs at suspicious transaction reports o STRs na isinumite sa AMLC.
Ganoon din ang sagot niya nang tanungin kung ito ay conclusive proof ng umano’y ill-gotten wealth.
“For the same answer, I can only rely on what’s provided in the records,” aniya.
Tinanong din kung conclusive proof ang mga records ng aktuwal na yaman ni Duterte sa kanyang Statement of Assets, Liabilities and Net Worth o SALN.
Sinabi ni Buenaventura na wala siyang kaalaman sa SALN ni Duterte at inulit na base lang ang summary sa mga CTR at STR na iniulat sa AMLC.
“So in other words, Atty. Buenaventura, as AMLC director, you simply do not have personal knowledge that will clearly establish that VP Sara amassed hundreds of millions or billions. Tama?” dagdag na tanong ni Vinluan.
“I have no personal knowledge, Your Honor, but what I’m testifying only is what are indicated in the records regarding transactions reported to us, Your Honor,” sagot ng opisyal.
666 CTRs at 55 STRs
Ayon sa AMLC, mula 2007 hanggang 2025, nakapagtala sila ng 666 covered transaction reports at 55 suspicious transaction reports na kinasasangkutan nina Duterte at Carpio.
Kabilang sa apat na articles of impeachment laban kay Duterte ang alegasyon na nakapag-ipon siya ng hindi maipaliwanag na yaman, hindi idineklara ang lahat ng kanyang ari-arian sa SALN, at hindi nag-divest sa mga business interest. Ernie Reyes
