MANILA, Philippines – Nagsamsam ang Criminal Investigation and Detection Group (CIDG) ng tinatayang P6.2 milyong halaga ng smuggled plywood at naaresto ang isang dayuhan sa San Simon, Pampanga.
Ayon kay Acting PNP chief Lt. Gen. Jose Melencio C. Nartatez, Jr., natukoy ang malakihang plywood sa pamamagitan ng intelligence habang pinalalakas ang anti-smuggling operations sa bansa.
Gamit ang search warrant at suporta ng lokal na pulisya, natagpuan ng CIDG sa Barangay Dela Paz ang 2,752 piraso ng 18mm Crocodile Phenolic Plywood at 4,272 piraso ng 12mm plywood. Nasamsam din ang isang improvised shotgun at apat na 12-gauge slugs.
“Ang hakbang na ito ay nagpapakita ng determinasyon ng pulisya na panatilihin ang kaligtasan ng publiko habang tiniyak na pananagutin ang mga lumalabag sa batas ng Pilipinas,” ani Nartatez.
“Pinatutunayan ng operasyong ito ang aming pangako na protektahan ang publiko mula sa mga ilegal na gawain na nakakaapekto sa kaligtasan at patas na kalakalan.” RNT
