MANILA, Philippines – Ayon kay Senador Bam Aquino, kasalukuyang may 166,000 classroom gap sa bansa, at maaaring umabot sa 230,000 pagsapit ng 2028 kung hindi ito maaaksyunan.
“Kinakailangan po talagang matutukan natin ang problemang ito,” sabi niya sa San Juan Mayor’s Dialogue.
Ayon sa senador, malalaki ang kakulangan sa Regions 3, 4A, NCR, at Region 7.
Noong 2025, 99 lamang ang bagong classroom naitayo.
Para tugunan ito, P66 bilyon ang ilalaan ngayong taon para makapagpatayo ng 25,000–30,000 classrooms, kabilang ang tulong mula sa local government units.
“Talagang desidido sila na mapunuan natin ang kakulangan ng classroom sa ating bansa,” aniya.
Ayon kay Education Secretary Sonny Angara, bukas ang programa sa lahat ng LGUs at nakadepende sa release ng pondo ng DBM.
Ang DepEd budget para 2026 ay P1.015 trilyon, pinakamalaki sa kasaysayan, na may P85.4 bilyon para sa basic education facilities kabilang ang:
–P65.9B para sa 24,964 bagong classrooms
–P7.7B para sa repair/rehab ng 11,886 classrooms
–P4.2B para sa completion ng projects, leasing, at site validation
–P3.6B para sa 25,451 set ng desks at furniture
–P1.1B para sa 258 Gabaldon school buildings
–P2B para sa tatlong medium-rise schools
–Iba pang pondo para sa learning centers, library hubs, at school health facilities.
