BEIJING, China – Itinanggi ng China ang pagkakasangkot ng kanilang pamahalaan sa viral AI-generated video na naglalarawan sa mga Pilipino bilang mga unggoy.
Ayon kay Chinese Foreign Ministry spokesperson Lin Jian, hindi gawa ng gobyerno ng China ang naturang video kaya wala siyang komento tungkol dito.
Kasabay nito, muling iginiit ng Beijing na hindi nito kinikilala ang 2016 arbitral ruling sa South China Sea. Aniya, ang desisyon ng arbitral tribunal ay “ilegal, walang bisa, at walang bisa bilang umiiral na desisyon.”
Nauna nang hiniling ng Department of Foreign Affairs (DFA) ng Pilipinas sa China Daily na alisin ang AI-generated video dahil umano sa pagiging “racist” at “lubhang nakasasakit.” Naghain din ang DFA ng pormal na diplomatikong protesta laban sa umano’y mapanlait at dehumanizing na paglalarawan sa mga Pilipino.
Patuloy na ginagamit ng Pilipinas ang 2016 arbitral ruling bilang batayan sa paggiit ng mga karapatan nito sa West Philippine Sea, habang nananatiling tumatanggi ang China na kilalanin ang nasabing desisyon. RNT/MDS
