MANILA, Philippines – Inaprubahan ng Senado sa ikatlo at pinal na pagbasa ang Senate Bill No. 1719 na pangunahing iniakda ni Senadora Loren Legarda na nagdedeklara sa buwan ng Abril bilang Philippine Veterans’ Month.
Layunin ng panukala na magtatag ng permanenteng pambansang balangkas upang parangalan ang mga beteranong Pilipino, pangalagaan ang kanilang mga pamana, at palakasin ang access sa mga programa para sa kanilang kabutihan at pang-edukasyon para sa kanilang mga pamilya.
Ayon kay Legarda, ang pag-apruba ng panukala sa sesyon ng plenaryo noong Marso 16 ay nagpapatunay sa tungkulin ng bansa na parangalan ang mga lumaban para sa kalayaan.
“Pinasan ng ating mga beterano ang bigat ng digmaan upang ang mga susunod na henerasyon ay mamuhay sa kapayapaan. Tinitiyak ng panukalang batas na ito na maaalala ang kanilang katapangan sa paraan ng ating pag-aaruga sa kanila at sa mga aral na ipinapasa natin sa ating kabataan,” ani Legarda.
Ayon sa opisyal na tala, may 464 na nabubuhay na beterano ng Ikalawang Digmaang Pandaigdig, 41 natitirang miyembro ng Philippine Civic Action Group na nagsilbi sa Vietnam, at 29 na beterano ng Philippine Expeditionary Forces sa Korea. Tinutugunan ng panukala ang agarang pangangailangan na maparangalan sila habang sila ay nabubuhay pa.
“Ang kagitingan ng ating mga beterano ay patuloy na nagbibigay lakas sa bayan. Sa bawat araw ng Abril, ipinapakita natin na ang pagkilala sa kanila ay may kasamang serbisyo at malasakit,” dagdag ni Legarda.
Inaatasan ng panukalang batas ang pagsasagawa ng magkakaugnay na mga aktibidad sa buong bansa upang parangalan ang mga beterano at palawakin ang kamalayan ng publiko tungkol sa kanilang mga ambag. Inuutusan nito ang Department of Education (DepEd) na isama ang mga kuwento ng mga beterano sa kurikulum ng batayang edukasyon, hinihikayat ang mga programang boluntaryo para sa kabataan, at tinitiyak ang mas maayos na access sa mga benepisyo at serbisyong pangkalusugan.
Pangungunahan ng Philippine Veterans Affairs Office (PVAO) at Department of National Defense (DND), katuwang ang Department of the Interior and Local Government (DILG), Department of Health (DOH), at DepEd, ang pagpapatupad ng batas.
Binigyang-diin ni Legarda na ang paggunita ay dapat magsilbing inspirasyon sa kasalukuyang panahon upang maging mapagbantay at maglingkod sa bayan, at paalala sa mga Pilipino na ang mga sakripisyo ng mga beterano ng digmaan ay dapat magsilbing gabay.
Sa pagdedeklara ng Abril bilang Philippine Veterans’ Month, gagawing kongkreto ang mga programa sa paggunita sa kabayanihan ng mga beterano at ang pasasalamat sa kanila sa pamamagitan ng edukasyon, pangangalagang pangkalusugan, at serbisyong publiko. Ernie Reyes
