MANILA, Philippines – Patuloy na naitatala ang volcanic earthquakes at mga pagyanig sa Bulkang Taal sa Batangas, iniulat ng Philippine Institute of Volcanology and Seismology (Phivolcs) nitong Lunes, Disyembre 23.
Naitala ng PHIVOLCS ang apat na volcanic earthquakes na sinamahan ng tatlong pagyanig na tumagal ng tatlo hanggang limang minuto nitong Linggo.
Isang araw bago nito, nakapagtala rin ang ahensya ng anim na lindol at limang volcanic tremors na tumagal ng tatlo hanggang anim na minuto.
Noong Disyembre 20, nakapagtala ang Bulkang Taal ng tatlong volcanic tremors na tumagal ng tatlo hanggang 39 minuto.
Tinukoy ng Phivolcs ang volcanic earthquakes bilang “generated by magmatic processes or magma-related processes beneath or near an active volcano.”
“Unlike tectonic earthquakes that are produced by faulting, volcanic earthquakes are directly produced by many processes and are therefore much more varied in characteristics,” paliwanag pa ng ahensya.
Samantala, ang volcanic tremors naman ay “continuous seismic signals with regular or irregular oscillations and low frequencies (typically 0.5–5 Hz) that can last for more than a minute.”
“Tremor can be caused by different processes inside the volcano, including resonance triggered by magma or magmatic gas flowing through cracks and vents, successive overlapping low-frequency earthquakes, and eruptions of magma.”
Sa pinakahuling update, nakapagtala ang PHIVOLCS ng 8,322 metriko tonelada ng sulfur dioxide na lumabas mula sa main crater ng Taal. Umabot ito ng 600 metro ang taas.
Sa kasalukuyan ay nakataas ang Alert Level 1 sa Bulkang Taal. RNT/JGC
