MANILA, Philippines – Pinaalalahanan ng Office for Transportation Security (OTS) nitong Miyerkules ang publiko na bawal dalhin sa Philippine airports ang mga baril o bahagi ng baril nang walang tamang dokumento.
“Gusto naming paalalahanan ang mga biyahero, lalo na ang mga lisensyadong may-ari ng baril, na dalhin ang kanilang mga dokumento kung nais nilang mag-transport ng baril,” ayon kay OTS Administrator Gilberto Cruz.
Kabilang sa kinakailangang dokumento ang license to own and possess firearms (LTOPF), firearm registration (FAR) card, at permit to transport (PTT) o permit to carry outside residence (PTCFOR) mula sa Philippine National Police.
Ito ay kasunod ng pagkaka-intercept ng isang firearm component (lower receiver) mula sa isang pasahero sa Ninoy Aquino International Airport Terminal 2 noong Martes.
Hindi pinayagang makasakay ang pasahero at nakaharap sa karagdagang pagtatanong dahil sa kakulangan ng tamang dokumento.
Sinabi ni Cruz na ang ilegal na pagmamay-ari ng pangunahing bahagi ng baril ay may kaparusahang kulong mula anim na taon at isang araw hanggang walong taon. Dave Baluyot
