PBBM, personal na nagbigay-pugay sa ‘Fallen Airmen’

MANILA, Philippines – Personal na binisita ni Pangulong Ferdinand R. Marcos Jr., Commander-in-Chief ng Armed Forces of the Philippines, ang Philippine Air Force (PAF) Mortuary sa Colonel Jesus Villamor Air Base, Pasay City, noong Biyernes, Nobyembre 7, 2025.

Ito ay upang magbigay-galang sa mga “fallen airmen” ng Super Huey helicopter na bumagsak sa Agusan del Sur habang nagsasagawa ng Rapid Damage Assessment and Needs Analysis (RDANA) operations matapos manalasa ang Bagyong Tino.

Sinalubong at mainit na tinanggap nina Major General Pablo E. Rustria, PAF Acting Vice Commander, kasama ang iba pang senior PAF officers si Pangulong Marcos.

Personal na ipinaabot ng Pangulo ang kanyang pakikidalamhati sa mga pamilya ni Captain Paulie B. Dumagan, PAF, at Second Lieutenant Royce Louis G. Camigla, PAF, na ang mga labi ay nakalagak sa PAF Mortuary. Ang mga labi ni Sergeant John Christopher C. Golfo, PAF, at Airman First Class Ericson R. Merico, PAF, ay nauna nang ibinyahe sa kani-kanilang mga hometown.

Sa mataimtim na pagbisita, naghandog ang Pangulo ng dasal at nagbigay ng tribute sa katapangan at dedikasyon ng mga fallen airmen, kinilala ang kanilang walang pag-iimbot na debosyon sa tungkulin at sa paglilingkod sa mga mamamayang Pilipino.

“The extraordinary heroism of these airmen, reflected in their unwavering commitment to serve others even at great personal risk, embodies their Unit’s (505th Search and Rescue Group) enduring creed: ‘So That Others May Live.’ Their legacy will continue to inspire every member of the Philippine Air Force to uphold the highest ideals of integrity, service, and excellence,” ayon sa ulat. (Kris Jose)