MANILA, Philippines – Nagbabala ang Cybercrime Investigation and Coordinating Center (CICC) laban sa paglaganap ng pekeng at recycled na social media content na sinasamantala ang nagpapatuloy na tensyon sa Middle East.
Ayon kay Undersecretary Renato “Aboy” Paraiso, executive director ng CICC, tila idinisenyo ang mga naturang post upang samantalahin ang pangamba ng mga Overseas Filipino Workers (OFWs) at kanilang pamilya.
Binanggit niya ang viral na 25-segundong video sa X (dating Twitter) na maling nag-aangking nagpapakita ng isang Filipina na nagla-live stream mula sa kanyang apartment sa Dubai habang tinatamaan umano ng Iranian missile. Lumabas ang post noong March 2 ngunit napatunayang kuha ito mula sa pagsabog sa Beirut Port sa Lebanon noong 2020.
Ayon kay Paraiso, na-verify ang video gamit ang Open-Source Intelligence (OSINT) at AI-assisted verification tools. Aniya, ang muling pagpapakalat ng ganitong video ay “engagement bait” upang makakuha ng views sa pamamagitan ng pananakot.
“We are seeing a rise in ‘engagement bait’ where historic tragedies are rebranded as current events to weaponize the fear of families waiting for news from their loved ones abroad,” ani Paraiso.
“Exploiting a humanitarian crisis to gain social media traction is not just unethical; it is a digital crime,” babala niya.
Sinabi ng CICC na maaaring managot ang mga nagpapakalat ng maling impormasyon sa ilalim ng Article 154 ng Revised Penal Code at Section 6 ng Republic Act No. 10175 o Cybercrime Prevention Act of 2012.
Hinimok ng ahensya ang publiko na i-verify ang pinagmulan ng mga video at huwag agad magbahagi ng hindi beripikadong content upang maiwasan ang dagdag na pangamba sa komunidad ng OFWs.
Maaaring i-report ang kahina-hinalang online content sa Inter-Agency Response Center sa Hotline 1326.
“Our priority is the digital safety and mental well-being of our citizens. We will continue to track and identify those who orchestrate these disinformation campaigns to hold them accountable under the law,” ani Paraiso. RNT/MND
