PASIG CITY — Pinagtibay ng Philippine Health Insurance Corporation (PhilHealth) at Philippine College of Surgeons (PCS) ang isang makasaysayang kasunduan noong Abril 17, 2026, na naglalayong mas mapabuti at mapalawak ang serbisyong pang-operasyon para sa lahat ng Pilipino.
Sa ilalim ng nilagdaang Memorandum of Agreement (MOA), magtutulungan ang dalawang institusyon sa pagbuo ng mas pinalakas na surgical benefit packages, referral networks, at mga pamantayan sa kalidad ng serbisyo. Ito ay susuportahan ng masusing pananaliksik at geographic mapping upang matukoy ang mga lugar sa bansa na nangangailangan ng higit na atensyong medikal pagdating sa operasyon.
Pinangunahan nina PhilHealth President at CEO Dr. Edwin M. Mercado at PCS President Dr. Joselito M. Mendoza ang seremonya ng paglagda.
“Ang mga eksperto sa operasyon ay isa sa aming pinakamahalagang katuwang sa pagtupad ng pangako ng Universal Health Care. Sa pamamagitan ng kasunduang ito, katuwang namin ang PCS sa pagbuo ng mga sistemang maglalapit ng de-kalidad na surgical care sa bawat Pilipino,” pahayag ni Dr. Mercado.
Disiplina at Etika sa Serbisyo
Bukod sa pagpapabuti ng mga benepisyo, titiyakin din ng PCS na ang lahat ng kanilang miyembrong siruhano ay susunod sa mga polisiya ng PhilHealth. Kasama sa kasunduan ang paghihigpit laban sa pandaraya o fraud detection at ang pagsasagawa ng ethical claims review.
Magkakaroon din ng magkatuwang na mekanismo ang dalawang panig upang mabilis na maresolba ang mga reklamo at usapin hinggil sa surgical claims.
Ibabahagi rin ng PCS sa PhilHealth ang mga pinakabagong best practices sa larangan ng operasyon upang matiyak na laging “up-to-date” ang serbisyong natatanggap ng mga miyembro.
Mandato ng Universal Health Care
Ang pagtitipun-tipon na ito ay bahagi ng mandato ng Universal Health Care (UHC) na layuning siguraduhin na ang lahat ng Pilipino ay may akses sa mga serbisyong pang-operasyon na ligtas, patas ang pagkakabahagi, at may pinakamataas na antas ng kalidad.
Tinitiyak ng partnership na ito na kahit saan ka mang sulok ng Pilipinas, dapat ay may makuha kang serbisyong pang-operasyon na ligtas, de-kalidad, at abot-kaya.
Para sa mga karagdagang katanungan, maaaring tumawag sa 24/7 hotline ng PhilHealth sa (02) 8662-2588 o mag-text sa kanilang mga mobile numbers:
* Smart: 0998-857-2957/ 0968-865-4670
* Globe: 0917-1275987/ 0917-1109812
