MANILA, Philippines – Wala pang nakasulat na kasunduan sa pagitan ng Pilipinas at Indonesia tungkol sa pagpapauwi ng Filipino death row inmate na si Mary Jane Veloso, sinabi ng isang opisyal ng Pilipinas noong Miyerkules.
“If you mean may written agreement, wala pa yung sagot. Pero sila mismo ang pumunta sa atin to talk about this, so we’re highly confident na mangyayari,” ani Department of Foreign Affairs (DFA) Undersecretary Eduardo de Vega sa press briefing sa Malacañang.
Sinabi ito ni De Vega bilang tugon sa pagtatanong kung ang pagbabalik ni Veloso sa Pilipinas — gaya ng inihayag ni Pangulong Ferdinand “Bongbong” Marcos Jr. kanina — ay pinal na dahil nagpapatuloy pa rin ang pag-uusap.
Sa kaparehong press briefing, sinabi ni Justice spokesperson Mico Clavano na hinihintay ng Pilipinas ang pormal na tugon ng gobyerno ng Indonesia sa kahilingan para sa repatriation ni Veloso.
Si Veloso ay inaresto sa isang paliparan sa Yogyakarta sa Indonesia noong Abril 2010 dahil sa pagdadala ng 2.6 kilo ng heroin. Hinatulan siya ng kamatayan ng isang distrito ng Indonesia noong Oktubre ng taong iyon.
Noong 2015, ipinagpaliban ang pagbitay kay Veloso sa huling minuto matapos maaresto sa Pilipinas ang isang babaeng hinihinalang nagre-recruit sa kanya para sa mga aktibidad na may kinalaman sa droga. RNT
