MANILA, Philippines – Nakipagkasundo ang Procurement Service ng Department of Budget and Management (PS-DBM) at Office of the Ombudsman para mapabilis ang pagtukoy at pagsugpo sa korapsyon sa government procurement.
Sa ilalim ng Data Sharing Agreement (DSA), magkakaroon ng direktang access ang awtorisadong tauhan ng Ombudsman sa mahahalagang procurement records sa Philippine Government Electronic Procurement System (PhilGEPS).
Kabilang dito ang supplier at merchant registration, ownership information ng mga kumpanya, procurement documents, supplier participation at eligibility, at audit trails. Mananatili itong saklaw ng mahigpit na privacy at security controls.
Layunin ng kasunduan na mapabilis ang pag-trace ng procurement activities, matukoy ang kahina-hinalang pattern ng korapsyon, at suportahan ang imbestigasyon at prosecution.
Ayon kay Budget Secretary Kim Robert de Leon, mahalagang mapigilan ang mga paglabag sa simula pa lamang at hindi lamang habulin ang mga responsable matapos ang insidente.
Sinabi naman ni Ombudsman Jesus Crispin Remulla na makatutulong ang data sharing para matukoy ang mga nakatagong relasyon at pattern ng korapsyon na mahirap makita kung magkakahiwalay ang records ng mga ahensya. Jocelyn Tabangcura-Domenden
