LEGAZPI CITY — Arestado ang isang pulis na nakatalaga sa Police Regional Office (PRO) 5 matapos umanong mangikil ng pera kapalit ng pagproseso sa medical phase ng Philippine National Police (PNP) recruitment.
Ayon kay PRO-5 spokesperson Lt. Col. Malu Calubaquib, nahuli ang 40-anyos na pulis sa isang entrapment operation noong Huwebes matapos umano itong tumanggap ng P38,000 mula sa isang aplikante.
Nakatalaga umano ang suspek sa Regional Medical Unit 5 at residente ng San Fernando City, La Union.
Matapos ang pag-aresto, isinailalim siya sa medical examination sa Legazpi City Hospital bago dinala sa Legazpi City Police Station para sa dokumentasyon at kaukulang disposisyon.
Sinabi ni PRO-5 Director Brig. Gen. Erosito Miranda na ipinapakita ng operasyon ang pinaigting na internal cleansing program ng PNP laban sa katiwalian at pang-aabuso sa serbisyo.
Binigyang-diin niya na ang recruitment process ay dapat manatiling nakabatay sa merito, malinaw, at walang impluwensiya o kapalit na pera.
“This serves as a stern warning that any irregularity or corruption within the recruitment process and the organization will not be tolerated. We will continue to intensify internal cleansing efforts to ensure that those who tarnish the service’s reputation are held accountable,” ani Miranda.
Samantala, iniutos ni PNP chief Gen. Jose Melencio Nartatez Jr. ang agarang pagsisimula ng dismissal proceedings laban sa suspek at pagsasampa ng kaukulang kaso.
“I am deeply infuriated that a high-ranking officer and medical professional would blatantly compromise the integrity of our recruitment system, and I have ordered an immediate investigation to determine if this extortion extends into a wider syndicate,” ani Nartatez.
Iniutos din niya ang masusing pagrepaso sa mga aplikanteng naproseso ng suspek upang matukoy kung may iba pang naging biktima o may mga iregularidad sa nakaraang recruitment activities.
Nauna ring may kahalintulad na kaso sa Bacolod City kung saan isang police corporal ang inaresto dahil umano sa pangingikil kapalit ng paborableng resulta sa recruitment process.
