MANILA, Philippines – Muling pinatawan ng contempt ng Senate panel sa pamumuno ni Sen. Risa Hontiveros nitong Martes ang kontrobersyal na pastor na si Apollo Quiboloy matapos itong muling mabigo na pisikal na dumalo sa imbestigasyon ng Senado sa umano’y sekswal na pang-aabuso sa mga miyembro ng Kingdom of Jesus Christ.
Sa isang liham, iginiit ng kanyang kampo na ang pagpilit kay Quiboloy na dumalo sa pagdinig sa Senado ay labag sa kanyang mga karapatan sa konstitusyon.
Tinutulan naman ni Sen Robin Padilla ang paghatol ni Hontiveros laban kay Quiboloy.
Isang araw bago ang pagdinig ng Senado, iniutos ng Department of Justice ang pagsasampa ng kasong child abuse at trafficking laban kay Quiboloy.
Ang kanyang abogado na si Ferdinand Topacio noong isang linggo ay humingi ng “ironclad assurances” na igagalang ang mga karapatan ni Quiboloy, habang tinitimbang nila kung dadalo o hindi ang pastor sa pagdinig ng Senado.
Sinabi ni Hontiveros noon na igagalang ang mga karapatan ni Quiboloy.
Nauna ring sinabi ni Topacio na ang batas ay hindi nagbibigay ng absolute power para sa sinumang komite ng Senado na mag-isyu ng subpoena. Sinabi niya na may mga limitasyon sa kapangyarihang ito ng kamara, batay sa mga desisyon ng Korte Suprema.
Ngunit sinabi ni Hontiveros na “[noong] nakaraan, ang mga opisyal ng Gabinete, mga mambabatas, isang kasalukuyang Pangulo ng Senado, at maging ang isang dating Pangulo ay nagsumite sa mga subpoena ng Senado at humarap bilang mga saksi.”
Si Quiboloy ay nahaharap din sa isang House probe sa umano’y mga paglabag sa prangkisa ng Sonshine Media Network International, isang media outlet na nauugnay sa kanya.
Samantala, sumugod naman sa Senado at nagkilos-protest ang mga supporter ni Pastor Apollo Quiboloy habang ginaganap ang pagdinig. RNT
