Tinatahak rin ni Sandara Park ang parehong landas na nilalakaran nina Heart Evangelista at Pia Wurtzbach—ang maging tampok sa mga prestihiyosong magazine covers sa Singapore.
Ang Korean pop icon ay bida sa pinakabagong isyu ng Grazia, isang kilalang lifestyle magazine sa nasabing bansa. Una na ring naging cover si Pia Wurtzbach ng naturang babasahin, habang si Heart Evangelista naman ay lumabas kamakailan sa cover ng Elle Singapore.
Ang photoshoot ni Sandara ay idinisenyo upang ipagdiwang ang kanyang dalawang dekada ng matagumpay na karera sa international scene. Tampok sa konsepto ng pictorial ang kanyang eleganteng anyo, kabataan, at modernong glamor.
Bagama’t pareho ang tagumpay na tinatamasa ng tatlo sa larangan ng fashion at media, nangingibabaw si Sandara bilang isang natatanging personalidad na hindi kailangang ikumpara sa iba.
Samantalang si Heart at Pia ay madalas na ipinagkukumpara, lalo na tuwing fashion weeks sa Milan at Paris, si Sandara naman ay tinitingala bilang isang artistang may sariling tatak at estilo—isang “rival to herself,” ayon sa mga fashion observers.
Umaasa ang ilan sa mga fashion aficionados na ngayong abala si Heart sa mga proyekto sa Pilipinas, ay mababawasan ang tensyon sa pagitan nila ni Pia pagdating sa international fashion scene.
Sa huli, kitang-kita na sa kahit anong entablado man sila makita—local o international—ay kapwa namamayagpag sina Sandara, Heart, at Pia sa kani-kanilang natatanging paraan. Ronnie Carrasco III
