MANILA, Philippines – Itinanggi ni Senate President Francis Escudero ang alegasyong sinasadya niyang patagalin ang impeachment laban kay VP Sara Duterte.
Ani Escudero, sumusunod ang Senado sa Konstitusyon at panloob na alituntunin, hindi sa kagustuhan ng Kamara.
“Hindi ako sumusunod dahil gusto lamang ng Speaker ng Kamara na ma-impeach ang Ikalawang Pangulo. Gagawin namin ang aming trabaho ayon sa batas, ayon sa pananaw ng Senado, at hindi sunod-sunuran lamang sa gusto ng isang tao o ng kabilang Kamara, ani Escudero.
Tinukoy ni Escudero na mahigit dalawang buwan din bago kumilos ang Kamara sa reklamo, kaya’t hindi dapat pagmamadaliin ang Senado.
“Bakit hindi nila inihain agad? Bakit ngayon kami ang minamadali,” tanong ni Escudero.
Giit niya, hindi siya kumikilos dahil sa takot o impluwensiya, at nananatiling bukas at aktibo ang proseso. Inaasahang magkokonbena ang Senado bilang impeachment court sa Hunyo 11, bago ang sine die adjournment sa Hunyo 13.
“Kailanman ay hindi ako nagpasya base sa takot. At hindi rin ako tagasunod ninuman.” RNT
