Shabu lab sa Cavite, nabuking sa pagsabog

TANZA, CAVITE – Isang shabu laboratory ang nadiskubre matapos ang isang malakas na pagsabog sa isang bahay sa Brgy. Sahud Ulan, Tanza, Cavite, noong Enero 28 ng umaga.

Pinaniniwalaang naganap ang pagsabog habang may ginagawang produksyon ng iligal na droga sa loob ng bahay.

Ayon sa paunang ulat, apat na indibidwal—dalawang Indonesian at dalawang Pilipino—na umano’y nagpapatakbo ng mini shabu lab ang agad na tumakas matapos ang pagsabog.

Nangyari ang insidente bandang alas-6 ng umaga sa Leon Fojas Street, na nagdulot ng agarang responde mula sa Tanza Bureau of Fire Protection (BFP) sa pangunguna ni Fire Sr. Insp. Armand Lee Andres.

Pagdating ng mga bumbero, tumambad sa kanila ang iba’t ibang kemikal at gamit na ginagamit sa paggawa ng shabu, na nagpapatunay na isa itong ilegal na laboratoryo.

Sinuri rin ng Cavite Police, sa pamumuno ni Provincial Director PCol Dwight Alegre, ang lugar ngunit wala nang natagpuang suspek—tanging mga ebidensya ng paggawa ng droga ang naiwan.

Natuklasan ng mga awtoridad na ang bahay ay inuupahan mula pa noong Nobyembre 2024 ng isang Pilipina na may asawang Hapones, na kasalukuyang nasa ibang bansa.

Sa ngayon, patuloy pa rin ang imbestigasyon ng pulisya sa pagsabog at ang paghahanap sa mga tumakas na suspek. Margie Bautista