Isang signature campaign para sa pagbabalik ni dating Pangulong Rodrigo Duterte mula The Hague ang inilunsad nina dating Senador Gringo Honasan at iba pang personalidad.
Ang mga lagda ay kokolektahin sa Liwasang Bonifacio at online.
Iginiit ni Honasan na ang inisyatibang ito ay hindi laban kay Pangulong Marcos o pabor kay Duterte kundi isang pagkilos para sa kapakanan ng bayan.
Inaresto si Duterte dahil sa umano’y krimen laban sa sangkatauhan kaugnay ng kanyang war on drugs.
Ayon naman sa Malacañang, may karapatan si Honasan na maghain ng petisyon ngunit mas mainam na kumonsulta muna siya sa legal team ni Duterte, sapagkat maaaring hindi ito pansinin ng ICC.
Tinanggihan naman ni Honasan ang pangangailangang kumonsulta sa mga abogado ni Duterte, iginiit ang pagiging independyente ng kampanya.
Binanggit ni SAGIP Rep. Rodante Marcoleta na pinapayagan ng ICC ang mga NGO na magpahayag ng suporta. Kinuwestiyon din niya ang pagiging malinaw ng proseso ng pag-aresto kay Duterte, kabilang ang pagpapakita ng warrant at ang papel ng Interpol.
Samantala, tinutulan ni Honasan ang panawagan ni Harry Roque para sa isang people power protest, at hinihimok ang publiko na magtimpi at makipagdayalogo sa halip. RNT
