MANILA, Philippines – Sinabi ni Senate President Vicente “Tito” Sotto III nitong Lunes na hindi maaaring pilitin si Vice President Sara Duterte na humarap sa impeachment trial sa Senado kung matuloy ang kaso mula sa Kamara, ngunit mas mabuti umano kung siya ay dadalo.
Ayon kay Sotto, bagama’t hindi nakasaad sa impeachment rules na obligado ang akusado na dumalo, mas mainam pa rin kung haharap ito sa paglilitis.
“Yes, she should attend. It would be better to attend the trial,” aniya.
Ginawa ni Sotto ang pahayag matapos na hindi dumalo si Duterte sa impeachment proceedings sa House Committee on Justice, kahit ilang ulit siyang inimbitahan. Sa kabila nito, nagpatuloy ang Kamara sa pagdinig at kalaunan ay inaprubahan ang articles of impeachment.
Ibinigay ni Sotto ang halimbawa ng impeachment trial ni dating Pangulong Joseph Estrada na hindi rin nakadalo, at ni dating Chief Justice Renato Corona na personal na humarap sa kanyang paglilitis noong 2012.
Dagdag pa niya, kung maipasa sa Senado ang impeachment, agad niya itong irereport sa plenaryo at ire-refer sa committee on rules.
Kapag naging impeachment court ang Senado, manunumpa ang mga senador bilang hukom at ang Senate President ang magsisilbing presiding officer.
Iminungkahi rin ni Sotto na magkaroon muna ng pre-trial bago ang aktuwal na paglilitis upang maiwasan ang kalituhan, batay sa karanasan sa Corona impeachment case.
“So, what I will do here, based on experience, is conduct a pre-trial first before the trial proper,” aniya. RNT/MND
