MANILA, Philippines – Inatasan ni House Speaker Faustino “Bojie” Dy III ang agarang pagpasa ng panukalang batas na magtatatag ng iisang national minimum wage at mag-aalis sa Regional Tripartite Wages and Productivity Boards bago sumapit ang Labor Day sa Mayo 1.
Ipinag-utos ito ni Dy matapos siyang makipagpulong noong Pebrero 24 sa mga pangunahing may-akda ng panukala at mga lider ng malalaking grupo ng manggagawa, kabilang ang Federation of Free Workers at iba pang national unions, upang pag-isahin ang balangkas ng reporma.
Pinagsasama ng consolidated bill ang ilang panukalang nakabinbin sa House Committee on Labor and Employment na inakda ng mga mambabatas mula sa iba’t ibang partido, na nagpapakita ng malawak na suporta sa Kamara para baguhin ang kasalukuyang sistema ng pagtatakda ng sahod.
“I fought for higher wages during my time as governor of Isabela,” ani Dy. “We owe our workers a fair and unified wage system, and the House will act on this.”
Matapos ang pulong, iniutos ni Dy na isama ang panukala sa plenary agenda sa susunod na linggo at tiniyak na tatalakayin ito agad upang maipasa bago ang Labor Day.
Sa ilalim ng panukala, ililipat sa National Wages and Productivity Commission ang kapangyarihang magtakda ng sahod kapalit ng mga regional wage boards. Isinusulong ang phased approach kung saan ang panimulang national minimum wage ay hindi bababa sa umiiral na rate sa National Capital Region (NCR). Mayroon ding transition support mechanisms upang matulungan ang mga sektor na maaapektuhan.
Nakatakda ang plenary debate sa panukala sa susunod na linggo, ayon kay Dy. RNT
