UNITED STATES – Naaresto ng mga awtoridad sa Los Angeles, California ang suspek sa pamamaril-patay sa apat na indibidwal, kabilang ang dalawang Filipino noong Nobyembre 16.
Inanunsyo ng Los Angeles County Sheriff Office ang pagkakaaresto sa 19-anyos na suspek na si Miguel Sandoval, residente ng Lancaster.
Ayon sa Sheriff’s Office, sinampahan ng murder si Sandoval dahil sa pagpatay kina Christine Aca-Ac, 26, at Janvi Maquindang, 21, kapwa Filipino at magkapatid, maging sina Edwin Garcia, 24, at Matthew Montebello.
Natagpuan ng mga awtoridad ang bangkay nina Christine at Janvi, kasama ang fiancé ni Christine na si Garcia na may mga tama ng bala. Namatay naman sa ospital dahil sa tinamo ring tama ng bala si Montebello.
Binaril din ng suspek ang tatlong aso ng mga biktima.
Agad na tumakas si Sandoval matapos ang pamamaril na tinangka pang sunugin ang bahay ng mga biktima.
Nakatawag pa sa 911 ang isa sa mga biktima dahilan para makaresponde agad ang mga awtoridad.
Hindi pa inilalabas ng mga imbestigador ang motibo sa krimen.
Naghahanda na ang Sheriff’s Office na ipresenta ang kaso laban kay Sandoval sa District Attorney’s Office sa Lunes. RNT/JGC
