MANILA, Philippines – Inaprubahan ng Regional Tripartite Wages and Productivity Board (RTWPB) sa Caraga ang dagdag-sahod para sa mga empleyado sa pribadong sektor at mga kasambahay simula Enero 2026.
Ayon sa Wage Order Nos. RXIII-20 at RXIII-DW-06, makatatanggap ang mga manggagawa sa non-agriculture, agriculture, serbisyo/retail, at manufacturing ng karagdagang PHP40 sa dalawang bahagi—PHP20 sa Enero 3 at PHP20 sa Mayo 1—na magtataas ng minimum wage sa PHP475.
Ang sahod ng mga kasambahay sa rehiyon ay tataas sa PHP6,500 kada buwan simula Enero 3. Saklaw ng pagbabago ang mga lungsod ng Bayugan, Bislig, Butuan, Cabadbaran, Surigao, Tandag, at mga probinsya ng Dinagat Island, Agusan del Norte, Agusan del Sur, Surigao del Norte, at Surigao del Sur. RNT
