MANILA, Philippines – Sa kauna-unahang pagkakataon, nagtalaga ang Catholic Bishops’ Conference of the Philippines (CBCP) ng isang layperson sa pamumuno ng kanilang communications arm.
Si Edwin Lopez, 65, ang itinalagang executive secretary ng CBCP Episcopal Commission on Social Communications (ECSC), pumalit kay Fr. Ildefonso Dimaano na naging spokesperson ni CBCP President Archbishop Gilbert Garcera.
Makikipagtulungan si Lopez kay CBCP-ECSC Chairman Archbishop Rex Andrew Alarcon upang isakatuparan ang pastoral vision ng mga obispo sa konkretong programa, mangasiwa sa implementasyon, makipag-ugnayan sa communications, at magsilbing technical at administrative officer ng komisyon.
Miyembro rin siya ng TV Maria board at propesor sa San Carlos Seminary, na may postgraduate degrees sa business administration, international management, at development communication, pati na rin doctoral units sa commerce. RNT
